本帖最後由 HOTMAN 於 2018-12-28 19:29 編輯
唔知點解一到年尾就好想做下總結，突然諗起冇點總結過自己聽歌既經歷。 我諗每個人都有自己成為樂迷既一條路，每個人都有自己對歌曲既記憶。 之前有個post講陪你成長既歌，已lock左， 咁我就係度趁仲有記憶，講下對我好重要既十首歌同碟啦 大家都一齊share陪你地長大既歌lalala！
(一) 容祖兒 - Reflection of Joey's Live
除左一堆兒歌之外，我對廣東歌最早既記憶其實係容祖兒 事關我姑姐係一個痴呆祖粉，一放假就會狂煲容祖兒演唱會。 有一段時間佢係咁睇Reflection of Joey's Live（當時唔知係咩演唱會，大個左先睇番）， 仲要用部大電視係度播，成日阻住我打Ｗii， 所以當時我真係好討厭呢個女人，反祖可以話係由細培養。 
(二) 張敬軒 - 酷愛
我第一次有印象睇既叱吒係07年，訓覺前睇到酷愛拎至尊歌， 個晚我聽左咁多首都覺得悶爆，惟獨呢首一聽愛上，覺得個節奏好特別，歌詞聽一次就記得。 訓醒就去youtube search番叱吒黎睇，聽佢男銅感言同埋聽佢其他歌，特別係迷失表參道， 覺得佢既歌好grovvy，好正，所以就做左佢粉絲。 作為呢個yes! card既last generation，當時我用左幾十蚊買左軒仔一set金簽銀簽，以當時既我都算幾多。
(三) 張敬軒 - Urban Emotion
咁我成長既年代其實就係跑online風靡全港既時間，基本係日玩夜玩， 咁又好衰唔衰隻game係有背景音樂，所以個時就比雪花抄洗腦。 另外，個時櫻花樹下係呢隻game係好hit，成日未開game前都會打幾句如有天櫻花再開宣傳下偶像咁樣。 個時未有聽歌APP，我聽歌既途徑係靠藍牙，全班同學send黎send去， 個時都收到好多張敬軒同林峰既歌，變左成日聽佢地，不過係藍牙世界最Hit既歌都係以下呢堆。
(四) 鄧紫棋 - G.E.M
其實我真係冇點主動接觸過gem，但個時佢係hit到無可能唔識， 基本上係首首歌都會聽過，仲有d同學會拎個gem file上堂， 記得有個同學帶左一堆gem yes card番學比人沒收。 當然我手機都係有All about you同Where did you go， 因為有好多人send過黎，我亦有日聽夜聽， 真係好好聽，而家聽番都覺得寫得好好 
(五) Super Junior - Bonamana + Sorry Sorry除左G.E.M之外，最常聽當然係個時突然冒起既kpop。 手機第一首download既就係Nobody，呢首歌既beat真係好dope， 一聽就會想跳舞，亦係第一次我覺得個耳筒個bass係有用。 不過個時我唔係最迷Wonder Girls或者少時，而係Super Junior Bonamana同Sorry Sorry 到而家都記得某D steps點跳 個時放學有堆朋友會一齊開段video學跳唔同Kpop 某程度注定我聽歌無Beat不歡既習慣。
(六) Lady Gaga - The Fame + The Fame Monster
去到中學，個潮流又轉一轉，好興聽歐美流行。 當然Lady Gaga係影響我好多， The Fame + The Fame Monster可以話係影響得我最深最深既一張唱片。 基本上係奠定我對一張唱片既標準，我會係鍾意一張碟大部分歌都係悅耳有流行潛力， 整體上風格統一但唔可以沉悶或者無謂，可以同歌手某部分性格緊扣， 亦要有些少另類或者唔同既元素，最好係要有成為潮流既野心，咁既唱片最得我歡心。 到後來Born This Way我都係好鍾意，某程度係因為我對舞曲既偏愛。 呢隻碟既暗黑visual對我衝擊好大，BTW個mv我睇左幾日先敢睇哂， 到Judas後我已經係愛Gaga愛到不行。
(七) Avril Lavigne - What the Hell
同期有其他歐美女歌手對我衝擊好大，例如Avril Lavigne， 個時有個同學比我聽What The Hell， 見到個MV嘩著bra出鏡咁淫既， 睇tvb大既我無諗過可以咁樣，後來聽埋Katy Perry，Jennifer Lopez, Britney Spears既歌，基本上已經對裸露麻木左。 我係2011年歐美女歌手舞曲當道既時候開始認真聽歌， 個時聽歐美好開心因為首首歌都岩我聽，堆MV都好好睇， 某程度上都係奠定左我咁鍾意研究MV既習慣。
(八) 謝安琪 - 你們的幸福
咁又會好奇怪，如果真係無beat不歡，點解會鍾意謝安琪。 其實我真係認真聽Kay第一首歌係十二月二十， 個時喜歡聽1872遊花園，有晚聽到呢首十二月二十， 基於收電台會有d濛，加上耳機有d唔清，加上堆歌詞又快又密， 我完全聽唔到唱咩，以為係Kpop黎 唱到第二段先聽到有d廣東話先知唔係。 因為呢首歌播左十幾星期，所以我聽左好多次， 一開始我覺得條女扮哂野唱埋d非主流題材（個時好憎d歌手懶係另類咁）， 但慢慢發覺首歌個曲好洗腦，成日無啦啦係個腦度響起，忍唔住就download左。 之後你們的幸福出既時候，覺得好岩聽（好細個就好鍾意富士山下）， 同埋個時都有另一位friend成日叫我聽佢，仲送左隻你們的幸福比我 （不過佢之後話唔記得入歌拎番隻碟，至今都未還）， 睇完你們的幸福mv覺得佢真係勁令女，於是就被導左入歧途。 到你們的幸福concert重聽番佢之前既歌，發覺佢歌庫入面既genre真係多到數唔哂， 超級多元化，令我發現beat唔止edm一個世界， 可以係rock，reggae，psychedelic，jazz，country，newage。 個時成日同kay粉討論唔kay唔同既音樂元素， 好似掘寶庫咁，好開心。 至於本土呀時事呀都係開始聽佢之後先留意， 我係比佢音樂吸引先於佢既idea既。
好啦打左好多字好攰了，剩底既遲D再打 | 
發表於 2018-12-28 19:25
| 
發表於 2018-12-28 22:25
|