點解 AGA 作曲咁好聽？

本帖最後由 just11256 於 2018-10-21 15:55 編輯

AGA 係近年香港樂壇最驚艷嘅新人，出道只係幾年但係風格越嚟越統一、成熟，更成為炙手可熱嘅作曲人。我覺得佢真係好勁，除咗因為多產之外（成日聲稱有幾百隻 demo），因為佢自稱冇受過啲咩訓練，只係做空姐嗰陣想作曲，但交出嚟嘅作品真係好難令人相信佢唔係一生立志做音樂人。佢作嘅曲唔單止有一定嘅質素保證，最犀利係你一聽就知道係佢作，其實因為佢作曲有一定嘅套路，而佢已經將呢樣嘢風格化。

好多人都覺得 AGA 作曲好「歐美式」，當然唔係淨係因為有好多英文。佢曲風歐美，因為一個好大好大嘅特色：不斷重複同一個音。最成功嘅例子當然係佢至今嘅代表作《3AM》。

好多歐美最 top 嘅作曲人（例如 Taylor Swift）都好鍾意用呢個技巧。呢個技巧有幾個好處，包括一、易入腦，二、將變化擺喺節奏，三、突出歌詞。第一點，阿媽係女人嘅道理，試想象一句旋律啲音飄嚟飄去比起一句旋律永遠都係同一個音，邊句易記啲。將旋律音調嘅重要性減低，除咗顛覆廣東歌傳統，更加將聽覺嘅重點放喺節奏、歌詞、編曲、演繹甚至 MV 等方面，聽歌由聽旋律變成聽氣氛、聽 package，聽眾嘅記憶會更加鮮艷。第二點方面，見到佢第一句越遞進個節奏就越密集，但冇搶拍，好似有一步一步加速前進嘅感覺，令你隻耳有意欲去衝去終點。去到終點「how to say goodbye」有兩下搶拍令首歌更好「un」。作為一句 hookline，呢句根本係教材級。第三點較為特別，粵語有聲調限制，作詞人好難將一句歌詞全部寫同一個音，所以呢種寫法喺廣東歌嚟講相對冇咁普及。但 AGA 偏偏唔理，令到佢嘅旋律喺樂壇入面突出，亦都解釋咗點解佢啲歌咁多英文歌詞，因為根本寫唔到粵語歌詞。

但 AGA 嘅功力唔淨係得咁多，睇下 chorus 第二句就會明。第二句又上又落，全部搶拍，同第一句完全相反。兩句之間有反差，隻歌不斷帶你隻耳去新嘅地方，去到第二句最後兩個音先真正停喺主音。AGA 嘅同音旋律例子真係數唔晒，例如「I can smile a little more，sing a little more」、「過去我對與不對，再要計較太瑣碎」、「how many lonely nights without you」等等。當然，AGA 亦好擅長寫港式旋律，尤其係 Eric Kwok 最鍾意嗰隻 chorus 頭兩句一樣字數（例：「你一次匆匆的遇到，我憶起溫馨的懷抱」、「這叫做成熟吧，誰都會活過去」），但由於唔太特別，所以唔詳細分析。

但其實都有冇咁成功嘅例子，例如《小問題》。

《小問題》之所以冇咁成功，因為有啲似想複製《3AM》咁，但《3AM》嘅優點通通都冇。啲音重複得嚟節奏冇變化，「只需很悉心的設計」嗰句格硬填粵語詞，聽落好似念經。不過都係嗰句，你隻耳去咗編曲到，你就會俾佢嘅中國風編曲吸引。你聽完記得嘅唔一定係 chorus 嘅旋律，但會係中國風編曲同 MV 個古怪 look。所以佢嘅歌其實一定要有特別嘅編曲先會成功，《3AM》波多野裕介、《Nights Without You》Ted Lo、《小問題》T-MA 都係好出色嘅作品同編曲人，慢歌嗰啲普通舒文貨就較為一般。

另外 AGA 作嘅旋律有一樣嘢令我一聽就知係佢作。今年年初聽《無期》嘅時候，我一聽到就覺得：「嘩，呢下好 AGA」。我稱之為 the AGA turn。

就係「無人可比」嗰下，旋律轉上去，我覺得係佢嘅標誌。其實功能上冇乜特別，主要可以將一個 chorus 起死回生再重複一次，亦唔係得佢一個咁寫，但佢真係成日用，其他例子包括：「命運像流水，坦率去面對」、「消費愛情當消遣，如何膚淺~」。

最後一樣嘢其實同音樂冇關，只係心理上我覺得唱作人作嘅曲係好聽啲，因為唱出嚟嘅時候我會覺得成件事真誠啲，唔係工廠化。我覺得唱作人嘅感情、想法好似縫咗喺旋律入面，呢樣嘢唔一定同歌詞有關。歐美樂壇入面好多歌手都係唱作人，做唱作人唔係咩特別嘢，反而香港會頒一個特別獎畀唱作人。亦都解釋咗點解 AGA 係聽外語歌人多嘅 Spotify 入面竟然可以打入 all-time 五甲，因為佢唱歌某程度上加咗誠意分。香港人覺得香港樂壇「嚟嚟去去都係 K 歌」，其實嗰種鄙視某程度上源自於樂壇工廠化，歌手只係歌手，唱嘅嘢係人地寫嘅，咁即係所謂嘅唱歌機器。唯獨 AGA 嘅音樂賣到個性，令佢突圍而出。

1 評分人數

貢獻 + 15

Tonlo

放空

版主

Rank: 8 Rank: 8

積分: 4681
貢獻: 467
參與: 3477

2^#

發表於 2018-10-21 16:28 | 只看該作者

佢嘅曲風的確香港好少聽到
例如天橋認

所以我成日會被呢樣野吸引我聽多幾次

Btw 又學多左好多野 thanks!

iamsingingwong 發短消息加為好友 iamsingingwong 當前離線帖子 3544 積分 1256 貢獻 143 參與 1113 AP 0 最後登錄 2019-4-16 禁止訪問積分 1256 貢獻 143 參與 1113	22^# 發表於 2018-11-6 22:40 \| 只看該作者提示: 作者被禁止或刪除內容自動屏蔽
	簽名被屏蔽
	TOP

點解 AGA 作曲咁好聽？

[收藏此主題] [關注此主題的新回復]

[通過 QQ、MSN 分享給朋友]