- 積分
- 3500
- 貢獻
- 156
- 參與
- 3344
|
https://www.instagram.com/p/CJBJY38BS-Z/?igshid=17xc28ophrjnv
今年接下嘅其中一份工作就係幫Jay Fung做album嘅creative,眨吓眼就一年。對於Jay,工作上我地見過好幾次,係點頭之交,即係應該連Hello都冇講過,所以唔係唔熟,可以話係唔識。既然接得哩份工作,第一部就係認識,可以將Jay邊樣嘢放大,於是我做咗啲資料蒐集。
Jay Fung音樂做得好,就人所共知,至於其他?跑下步,打籃球,食下tea,著衫斯文靚靚咁,好陽光嘅一個人,但好陽光又唔算係一個容易放大嘅image,跑步亦未至於跑到有名次,係「跑下啦」嗰種,籃球都係,當我想有啲底先去接觸哩個人嘅時候,反而冇乜方向,一般人會有好鮮明嘅形象,有人好new age;有人好old school;有人好療癒;有人好話題,Jay係邊種呢?
到我真正認識Jay,大家有好多事都有啲相似,我諗個個男人去到三十哩啲年紀諗嘢都會有啲相似,有好多嘢要考慮時都唔再係剩係得自己,家庭、工作、愛人,都有好多要兼顧,That’s just life。Jay係點呢?好愛屋企人,好多謝一路陪實自己女朋友,工作上遇到冇信心嘅事,會寫晒喺表情,相信嘅事就會好興奮地去實行,做訪問時因為中文唔算太流利,會練習好多好多次,但創作音樂時多嘢講到好似小朋友,Jay係我見過最誠實地面對生活嘅人,如果呢一個就係形象呢?
「誠實」可唔可以係一個形象?好似唔太算,係咪唔太興?好似興都要有其他說法去包?但可唔可以唔包?唔興可唔可以令佢興?我諗已經有好多人好容易有一個hashtag,但人又唔係為一個hashtag而活,創作來自生活,有生活先有創作,與其去設計建立,不如攞返Jay最獨特嘅一面出嚟。
上回專輯《Detour》去完旅行,今次返到屋企,生活繼續、工作繼續、日常繼續,但旅程都要繼續。冇旅行都要有旅程,從來都唔因為地點而限制,仔細地去生活,去感受每一日有咩唔同,有咩微小嘅幸福。碟名《Awaken》唔只係Jay嘅awaken,亦係我哋嘅覺醒,我哋冇辦法預計到世界嘅下一步,但假如要完結,我哋想做緊啲咩?係邊一個城市?身邊係咩人?愛住邊一個人?或者我哋唔需要刻意建立形象,唔需要一個hashtag,唔需要峰迴路轉嘅劇情,人生本來就充滿故事。可以形容到Jay Fung嘅詞彙只有「馮允謙」。 |
|