sohrab_nd

終於揀好2020十大 :)

第一位：銀河修理員 Dear Jane
「真愛是任何形狀 對付百孔千瘡」「誰也破了等某位去補 而你有我保養和愛慕」覺得MV有一個位捉到鹿無脫到角，其實陳樂喺車行整車嘅嗰個角色可以發展多啲。記得以前睇過一句金句，話有個記者訪問一對老夫老妻一齊左65年，記者問佢哋點樣可以一齊行咁耐，嗰對couple答: ’We were born in a time when if something was broken we would fix it, not throw it away.’。

第二位：無力感 許廷鏗
《你在我在》、《大雄胖虎綜合症》、《演員的自我修養》，一路以嚟都覺得許廷鏗好適合唱pop rock，好稱身。今年入選我嘅十大第二，特別因為首歌難度高，同埋多謝佢幫香港人發聲。

第三位：致明日的夢 陳奕迅
一定要配埋嗰個現代舞MV睇，好鍾意林家謙呢個三拍圓舞曲，入chorus「搖曳裹」三隻字開始，真係畀首歌搖曳住，想跟住一齊跳。

第四位：時光倒流一句話 林家謙
家謙好紅。鍾意呢首歌個曲好有心思，好似佢自己喺電台訪問講，啲轉音係向下轉，最尾個chorus係降key，歌詞「難題是時光未許倒流 明日只可向下流」係跟住個melody一齊向下流，去營造嗰種不斷墜落嘅悔恨感，跌入無底洞咁樣。

第五位：健兒 Rubberband
呢個genre 嘅歌，一向都唔係市場上受歡迎，但係好欣賞RB咁多年都有keep住做。佢哋有一種其他band，甚至其他香港歌手都好少人嘅，對社會人文弱勢社群嘅關懷嘅角度。唔係一種好政治性，好立場鮮明，要你聽完義憤填膺嘅歌，或者渲染弱勢階層好慘，賣同情心嘅歌。RB嘅個genre 嘅歌，好似《細街盃》、《豬籠墟事變》咁，只係將spotlight擺去呢班平時社會無人留意嘅人，好似documentary咁樣講佢哋嘅故事，唔似得《天水圍城》咁寫到好悲情，RB會寫到希望嘅一面，呢種歌RB唔做唔會有其他歌手單位做。好多謝RB雖然知道呢種歌唔係最賣座都keep住做。

第六位：幸福門 Gin Lee
Gin Lee 係一個喺2020令我改觀嘅歌手。以前覺得環球死捧爛捧，但明明佢就捧極都唔紅，雙雙買views買到幾百萬，自欺欺人好搞笑。今年我覺得Gin Lee第一終於識揀啱歌做big hit，第二演繹入心好多，第三夕爺都交左好好嘅詞畀佢。《Dear Secret》做到一隻概念連貫又好聽嘅碟，對Gin Lee刮目相看。《幸福門》，《美男子與香煙》，《開燈熄燈》，同埋未plug嘅《成家》我都好鍾意，十大揀幸福門係因為覺得夕爺用家門寫人嘅內心對其他人嘅戒備同開放寫得好出彩：究竟幾時放低戒備，完全接受一個人行入嚟，將自己嘅內心嘅柔軟人敏感開放畀人接觸，幾時受夠傷，重新架上呢個防備，將自己嘅心重門深鎖。

第七位：迴光物語 Jer枊應廷
新人嚟講真係好驚艷，好鍾意佢嘅歌嘅空靈感，同埋Carl 嘅用心編曲。物語三部曲最鍾意呢首，鍾意嗰種絕處逢生，黑暗中堅持尋找光線嘅力量感。

第八位：原罪 鄧小巧
呢首歌聽到心都碎。啲掃琴聲同埋臨尾嘅風琴聲好大殺傷力，小巧嘅詞填得幾靚，一對情人分手，大家努力搪塞各種罪名，完成「不堪的最錯的答辯」，判處嘅刑罰就係分開嘅孤獨同埋回憶一直寄居喺腦海裏面，永久嘅折磨。我覺得小巧填啲詞有種小眾文藝feel，有潛力做香港版嘅艾怡良。期待小巧嘅新碟，大部分歌都係自己填詞。

第九位：十分錯 JUDE
自從《零分》嘅成功，各大唱片公司都爭相推啲年輕等上位女歌手出K歌；自從《隔離》合唱版嘅成功，唱片公司又爭相做啲K歌男女合唱版。喺呢個風潮嘅歌入面，我最鍾意JUDE嘅《十分錯》，首先JUDE咬字同唱腔好過《零分》嘅嗰把痴脷筋聲好多，同埋呢首歌就係擺明車馬要K，所以曲詞編都好易入耳。

第十位：原始心態 吳業坤
我個人好唔鍾意吳業坤星娛樂後期堆歌，佢自己都越做越flop。而陳詠謙就喺2018畀人大力反，反到2019全年自己收左皮。呢首歌既係吳業坤新公司first plug，喺我心目中亦係陳詠謙comeback 重拾自信重新出發嘅宣言。因為呢首歌同埋《蒙着嘴說愛你》，我都幾相信陳詠謙係手足，「雲霧太深 摩天都市連亮燈也很暗 抹煞僅有的方向感」寫得好有畫面。同埋我好鍾意「我要在我心開滿花 無人可以管」嗰一句，我覺得陳詠謙係致敬緊Voltaire嘅”We must cultivate our own garden”，喺時局昏亂，大家無比無力嘅時候，我哋要先照顧好自己嘅內心嘅小花園。呢首歌streaming成績差，四台成績都差，仲有抄歌鼻祖Alan Po跳出嚟話呢首歌抄《森林》(但係明明只係啲chord progression似)，不過喺我心目中呢首歌喺我嘅2020有個特殊嘅位置。

2019: http://www.cmusichart.com/discuz ... p;page=2#pid1377946

2018: http://www.cmusichart.com/discuz ... p;page=2#pid1253968