- 積分
- 5128
- 貢獻
- 1088
- 參與
- 2488
|
講吓啫,真係變五台?
本帖最後由 PenguinMusic 於 2018-4-11 19:58 編輯
呢個post好可能激嬲各位,小心慎入。
話說我早兩個月曾經出過post(連結),質疑香港現有嘅四台榜究竟能唔能夠真實反映潮流,仲提出設立第五台榜。當時都見到唔少人都覺得已經冇咁嘅需要(甚至應該減榜);亦有人提出唔同嘅第五台可能性,當中包括亞洲電視同騰訊合作開嘅一個榜。如果我同你講,有人已經將呢個榜認定為第五台榜,你又覺得點呢?
雖然呢個話題唔多人講,不過我都講吓啦。我有留意開維基百科上面有關派台歌、流行榜之類嘅文章,咁啱又見到呢篇嘢上面嘅流行榜入面多咗一個:「騰訊音樂流行榜」。我見其他歌手版面入面嘅派台歌成績表都將亞視呢個榜列喺「備註」一欄。基於好奇心,我又做咗少少功課,之後就對呢個所謂「第五台榜」有好大嘅保留。
睇返呢個榜嘅資料先。騰訊音樂流行榜喺今年二月(第五週)開始報榜,分咗香港、大陸、臺灣同韓國四類,每個榜有十個位,我哋留意返香港個榜。睇過香港榜過去十個禮拜嘅榜單,發現呢個榜根本就係一團糟。雖然得十個位,但係每一個禮拜都至少有一位歌星有多過一個禮拜上榜;再講冠軍歌,頭三個禮拜都係由容祖兒擔任,跟住兩個禮拜就由澳門歌手曾詠欣包辦,之後直到上個禮拜都係莫文蔚攞。唔計旁述不斷講無聊嘢,呢個榜睇落已經好唔掂,再加埋排位透明度極低⋯⋯亞視同騰訊,差極都唔會咁啩?
ViuTV個榜根本唔係流行榜;其他榜(包括共和榜)一係就知名度不足,一係冇大機構支持;曾經試過成為第五台榜嘅雷霆881同有線結果都係幾年就失敗告終,呢個「潛在第五台榜」又會點呢,大家拭目以待。我之前講嘅第五台榜係想令到香港流行榜更加好,但係似乎呢個「潛在第五台榜」又好似未得喎⋯⋯當然,維基百科呢家嘢都係信不信由你啫,更何況呢度大家都似乎未承認⋯⋯大家又覺得點呢?以下開放討論~ |
|