- 積分
- 40329
- 貢獻
- 4789
- 參與
- 31016
|
2#
發表於 2015-11-7 19:19
| 只看該作者
本帖最後由 chanchan0909 於 2015-11-30 21:30 編輯
榜名: CBM(Chart By Myself)
成立日期: 2010 年 1 月 1 日
簡介: 本榜 「CBM」, 為本人每周嘅音樂選擇而設立嘅排行榜, 於 2010 年成立, 至現時為止為運作嘅第 6 年, 每周會有 20 首歌上榜, 設立嘅目的除左每周推介 20 首音樂作品之外 , 亦為本人推介嘅歌曲喺來年年頭作一個年度總選 !
============================================================================================================
- 首先感謝有投票比本榜嘅榜主, 令到我舊年有機會加入輪流榜成為共和嘅一員, 感謝感謝 !
- 然後感謝一直支持本榜嘅其他榜主, 好榮幸喺過去一年可以同咁多位榜主交流下喺音樂上面嘅睇法 !
- 同埋要感謝呢個平台, 可以令到我可以分享到我近期鐘意嘅歌 ! 另外, 今年我亦都終於履行到我嘅計劃, 就係搞評分式季選, 而喺今年已完成嘅三季裡面都有好多位會員參與, 所以除左要感謝呢個平台之外, 亦都多謝今年有參與過我嘅季選嘅美會員 ! 實在係無言感激 !
============================================================================================================
榜規
1. 歌曲上榜取決於個人對歌曲嘅喜愛度, 絕對唔會因為討厭某位歌手而唔會將佢嘅歌上榜
2. 上榜歌曲大部份為 廣東/國語 嘅派台(四大電子傳媒)上榜歌, 間中會有非派台嘅 廣東/國語 歌曲上榜
3. 唔會限制歌曲上榜嘅周數, 歌手可以喺一周多過一首歌上榜
4. 每季會設立季選
5. 報榜時間喺星期日 (以本周為例: 2015.11.29-2015.12.05 為 w49, 本榜會喺 2015.11.29 發布 w49 的榜單, 所以準時交榜係無問題嘅)
============================================================================================================
CBM 年度總選
每年經過總選之後喺獎項上都會有 d 改變, 今年都唔例外, 決定取消部分獎項, 另外亦新增左一 D 獎項, 今年 19 個獎項為:
投票類 1. 年度我最欣賞歌手 | 2. 年度我最欣賞歌曲
幕後類 3. 年度最佳旋律 | 4. 年度最佳填詞 | 5. 年度最佳編曲 | 6. 年度最佳單曲製作人
歌曲類 7. 年度歌曲 | 8. 年度 MV
專輯類 9. 年度細碟 | 10. 年度專輯
歌手類 11. 年度新人 | 12. 年度卓越歌手 | 13. 年度躍進歌手 | 14. 年度男歌手 | 15. 年度女歌手 | 16. 年度組合 | 17. 年度樂圑 | 18. 年度歌手
其他獎項 19. 年度班霸
每個獎項都會訂立入選同評選嘅方法, 以下連結將會作詳細介紹
http://www.cmusichart.com/discuz/redirect.php?goto=findpost&ptid=9281&pid=675121
============================================================================================================
跟住就介紹一下我嘅榜啦,自從 2014 年起改左評選同規則之後, 真係逼到我聽多左好多歌, 同埋因為得 19 個獎, 每個獎項為左揀本年最佳, 真係會諗清諗楚 ! 另外呢, 前幾年我嘅榜比較重視廣東歌, 所以好少國語歌有冠, 今年明顯上國語嘅冠軍歌多左好多, 始終一首歌都係音樂人嘅心血, 作為樂迷嘅我都希望咩都聽下, 公平對待每首歌, 所以今年排嘅榜都會有廣東歌同埋國語歌 !
其實今年新人都算多, 不過高質素嘅新人就好少 ! 今年暫時上左 27 位新人嘅作品, 其中 Yan Ting, Myar, Redholic, 池希, 安俊豪, 祖絲, Dimension 尚算合格, 並未有特別突出嘅作品, 而演繹方面有好大嘅進步空間, ZolarWind 有實力但「乾坤卦」之後嘅作品未能體現到樂隊嘅合作性, 吳業坤, K.I.S., JUDE 嘅作品比前面咁多位好, 不過演繹方面都係需要加加油 ! 今年覺得唔錯嘅新人有 Another Kitchen 同 Nowhere Boys, 佢地嘅專輯都係好有諗法, 而且誠意十足, 無令人想「飛」歌嘅感覺, 期待佢地嘅第二張專輯 !
今年比較慶幸嘅係, 好多二三四五年生嘅歌手仍然有新單曲同新專輯 ! 而且質素都唔差 ! 喺我嘅卓越歌手獎都比較激烈, Super Girls, Robynn & Kendy, 許廷鏗, 岑寧兒, 林欣彤, 陳慧敏, 盧敏, 唐藝, Yukilovey, 馮允謙, 黎曉陽, Yellow!, 李拾壹, SiS 樂印姊妹, movin’, J.Arie, AGA, 黃靖, 鄭欣宜 等歌手爭呢個獎, 雖然係難選, 但都證明左香港樂壇嘅新力量係好有實力嘅 !
而一線歌手方面, 陳奕迅嘅「準備中」比之前幾張專輯失色, 不過成個 flow 聽落黎都好順暢, 整體仍然合格以上嘅 ! 謝安琪年頭成功承接 2014 嘅氣勢, 年中更有「羅生門」, 但年尾嘅 2 首國語歌就無咩驚喜 ! 楊千嬅今年派台嘅 4 首都係慢歌, 4 份詞都可以接受但後 3 首都未算好鐘意, 主要都係因為旋律較悶 ! 容祖兒算係今年一線歌手中比較出色嘅一位, 雖然曲風無太大突破但今年佢嘅作品當中, 我都係因為佢嘅演繹而加分 ! 所以以上幾位同其他歌手都係喺我個榜到解釋到點解有 d 歌可以拎到冠軍, 有 d 就成績無咁好 !
而今年嘅專輯中, 有幾位歌手嘅進步都幾突出, 好似周慧敏, 福音專輯「HIM」為佢帶黎新嘗試, 其中「天盡頭」係佢未嘗試過嘅曲風 ! 黃家強嘅演繹係全張「沉香」嘅一大缺陷, 不過勝在包裝, 歌單編排, 作品嘅編曲, 仲有一張全純音樂嘅碟, 呢 D 都係而家港樂做得唔係咁好嘅地方, 所以我覺得黃家強喺諗法上面算係行得幾前 ! 今年突出嘅仲有台灣樂團宇宙人, 今次「一萬小時」同前兩張專輯比較可以話係兩個唔同嘅宇宙人, 「一萬小時」展現左佢地嘅作品開始走向成熟, 希望佢地繼續努力 !
整體黎講, 今年嘅作品都算唔錯, 寄望 2016 年有更多出色嘅新聲音同新作品, 而我亦會繼續努力推薦更多好嘅作品, 亦都希望可以繼續同各位交流下喺音樂上面嘅睇法 ! 多謝大家 !!! |
|